यो साल पनि ,

पोहर साल जस्तै

फोहर नाल सफा गर्दै,

मोहर सुका नाफा भन्दै

अर्को साल फेरी आउछु भन्दै  गयो .

हरेक साल, यसरी नै

मालामाल हुने,

फालाफाल हुने

सपना बेच्दै

रत्न पार्कको हल्लाउदै सुघाउँदै

ओखती बेच्नेको चटके जस्तै

नयाँ साल फेरी आउंदै छ ,

नयाँ माल फेरी आउंदै छ .

आउँदो साल,

यो सालको तालमा न आओस ,

यस्तै चाल र हालमा न आओस ,

केही त नयाँ,

चन्द्रमा दाँया

अलिकति आशा, उमङ्ग

अलिकति जोश र तरंग

जीर्ण पुर्जामा अलिकति उर्जा

बोकेर,

घोकेर

धोकेरै

भए नि आओस ,

नेपाली जनमा

नेपाली मनमा

हराएको मुस्कान

राष्ट्रियताको मुहान

फुलोस फलोस

यसरी नयाँ साल

आओस आओस . 

बहुत सुन्दर ठुल्दाइ ...

ल मेरो तर्फबाट नयाँ सालको यो कविता

नयाँ बर्ष,
तिमी सधैं झै यो पटक पनि
त्यही पुरानै शब्द 'नयाँ' टस्साँउदै आयौ।
तर के तिमीले नयाँ अनुभूति,
नयाँ उत्साह र नयाँ आशा
पनि आफूसँगै बोकी ल्यायौ?

थाहा छैन मलाई
तिम्रो आगमन पछि
म नयाँ के के पाउँछु,
म त सधैं उस्तै नै छु,
र शायद मेरो वरिपरि पनि उस्तै नै पाउनेछु ।
थाहा छैन मलाई
तिम्रो आगमनमा
म यो उत्सव किन मनाइरहेछु,
शुभकामना त सबैबाट
अँगालो भरि भरि पाइरहेछु,
के यो उत्सव केवल क्यालेन्डरमा हुने
अंक परिवर्तनको हो?
वा यो उत्सव केवल
जमघट र रमाइलो गर्ने बहानाबाजी हो?

नयाँ बर्ष,
भैगो तिमी फगत एउटा बहाना बनेर नआउ,
क्यालेन्डरहरुमा फेरिने अंक मात्र बनी पनि नआउ,
म त उस्तै नै रहनेछु,
तर तिमी मभित्र बदलिएको
बिचार भई आउ,
म भित्रको अहम् र स्वार्थलाई
सिध्याउदै आउ,
देशको अस्तव्यस्त राजनितीको
निकास भइ आउ,
दुर्गाम गाउँ र बस्तीहरुमा
बिकास भइ आउ,
लोडसेडिङको अन्धकारमा डुबेको शहरमा
उज्यालो बनी आउ
भोक, रोग र शोकले चाउरिएका अनुहारहरुको
मुस्कान बनी आउ
अनि आपसी एकता, सहयोग र सद्भावको लाली बनी
मेरो मन-मष्तिस्कमा छाउ
हामी सबैको मन-मष्तिस्कमा छाउ

हो नयाँ बर्ष, सबैतिर तिमी
सन्देस यही छर्दै जाउ,
तर बिन्ती मेरो,
केवल क्यालेन्डरहरुमा फेरिने अंक भई नआउ